الأربعاء، ذو الحجة 29، 1425

عندما تصبح مجلة ميكي من أمهات الكتب - وائل عباس

والله زمان
بقالي حوالي سنة او يزيد لم اكتب عن عمرو خالد وكنت قد قررت فعلا ان لا اكتب عنه مرة اخرى ومسكت نفسي بالعافية في رمضان اللي فات وسبته يصوصو لشباب المسلمين الغلابة كل يوم لحد ما جالي العصبي من صوته المسرسع ... والغريب انك تجد الشباب من مؤيديه يزعمون انهم زهقوا من الشيوخ الزاعقون والناعقون ذوي الاصوات الاجشة ... واقول لهم : ورضيتم بالسرسعة ؟؟؟ ... لكن الحمد لله عدت على خير وما حصليش حاجة في اعصابي ... لكن برضه للاسف مطلوب مني ما اجيبشي سيرته خالص على لساني والا القى علي تلامذته قاذوراتهم ... وللاسف من تلامذته شيوخ بلغوا سن المعاش كانوا قد نسوا دينهم طوال عمرهم والان جاؤوا ليتذكروه على يد المبدع الملعلط والداعية اللولبي عمرو خالد ... حقيقي اللي اختشوا ماتوا ... ربما لم يقل لهم عمرهم هذا اذا بليتم فاستتروا ... ولم يقل لهم ايضا ان قلة الادب والشتيمة عيب وليست من الاسلام في شيء ... ان مثل هؤلاء كمن يزعم ان مجلة ميكي جيب هي من امهات الكتب ولا يستحي !!! ماهو اصل النملة تفتكر الصرصار وحش ... وما اشعل تلك النار مرة اخرى كان مقالي عن عمرو دياب وعبد الناصر والذي قارنت فيه بين جرأة عمرو دياب للكلام في السياسة والخنوثة السياسية لعمرو خالد والجلية للعيان برغم ادعاؤه الاصلاح شأنه شأن جماعة المخنثين سياسيا التي تسانده الا وهي جماعة الاخوان !!! ولست اول من يعقد تلك المقارنة بالمناسبة لكن هذه المرة لم تكن كفة عمرو خالد هي الراجحة ...

والان اكشف لكم معلومة ربما لم تعرفوها من قبل وهي انفرادة حصرية عن عمرو خالد لتوضح لكم ما خفي من شخصية وماضي هذا الرجل ومن وما الذي صنعه ... ايها السادة طوال دراسة عمرو محمود حلمي خالد الجامعية في الثمانينات كان عمرو خالد صنيعة اجهزة الامن وكان الطالب العصفورة كما نسميه نحن ايام ما كنا طلبة ... عمرو خالد حصل على بكالوريوس التجارة شعبة محاسبة بتقدير مقبول وهو التقدير الذي يستحقه ولكن كان التتويج والتكريم له من قبل الاجهزة الامنية هو جعله رئيس اتحاد طلبة كلية التجارة !!! ثم نائب رئيس اتحاد طلبة كليات جامعة القاهرة تقديرا لخدماته الجليلة ... اي الرجل الثاني في العصفرة لاجهزة الامن ضد الطلاب وغصبا عن جميع التيارات السياسية الموجودة بالجامعة انذاك والتي لم يكن عمرو خالد منتميا لاي منها بما فيها الاخوان الذين يحتضنونه حاليا ... واتحدى اي شخص يقول اني كذاب !!!

وعندما كتبت من قبل عن عمرو خالد قالوا انت بتغتابه في غيابه والاولى انك توجه كلامك له هو شخصيا وتراسله وقمت بالتوضيح لهم مدى جهلهم بموضوع الغيبة هذا او انهم يستخدمونه عن عمد كنوع من الارهاب الفكري لثقتهم في تديني الفكري والحمد لله وان كنت مقصرا قليلا في الممارسة فقالوا يدخلولي من هذا الباب ويلعبوا على الاوتار الحساسة ظنا منهم ان تديني قشري مثلهم لا اعمال للعقل فيه ولا خلفية ثقافية واقتناع عقلي تسانده وبالتالي اي كلام حق يراد به باطل ممكن يهزني لكن نقبهم على شونة ... ودعوني اقتبس رأيا لي سبق نشره في الردود على مناصري زغلول النجار:

"بعض الردود اللتي وصلتني كانت من الجهل بقواعد الموضوعية والتفكير العلمي والعمل الاعلامي والصحفي بل والجهل بالدين والفقه الى درجة اتهامي بالغيبة بدعوة ان الاسلام يحرم الغيبة ... فارد انا واقول بل الاسلام يحلل الغيبة تماما ولا يؤثم صاحبها وهو ما اتفق عليه جميع الفقهاء في حالات معينة والا ساد الارض الفساد و الطرمخة وذلك في الحالات التالية :

- التظلم الى السلطان او القاضي ... من ظالم لنفسه ودينه واهله
- الاستفتاء في ما يفعله شخص ... من زيف وتزوير وفبركة وكذب وتاليف
- الاستعانة على تغيير منكر
- تحذير المسلمين ونصحهم
- ذكر المجاهر بما فيه
- التعريف
وقديما قال الشاعر:
الـقـدح لـيـس بغيـبـة في سـتة ... مـتظلم ومـــــعرف ومـــحـذر
ولمظهر فسـقا ولمسـتفت ومن ... طلب المعـونـة في ازالة مـنكر"

وعموما انا يكفيني ما رواه البيهقي عن ان النبي صلى الله عليه و سلم قال: حتى متى ترٍعُون عن ذكر الفاجر اذكروه بما فيه ليحذره الناس !!!

وبالفعل اخذت بنصيحة هؤلاء وياليتني لم اخذ بها ... وبحثت عمن لهم صلة بعمرو خالد لتوصيل كلامي اليه وبالفعل اوصلوا انتقاداتي له ولكنني صدمت من ان عمرو خالد اخذ ما كتبته في مقالاتي التي وصلته وسرقه بل وبكل بجاحة وضعه في اول حلقة من سلسلة صناع الحياة والتي لي كل الحق في ان ادعي انني صاحب فكرتها وان لم يفهمها عمرو خالد واصر على تطبيقها بطريقته القديمة الا وهي طريقة حواديت ابلة فضيلة وبابا شارو و ساوضح لاحقا بالتفصيل كيف سرق عمرو خالد افكاري بالتفصيل ...

والمستفز في الامر انه وصلتني بطريق غير مباشر دعاوى للمساهمة في اعداد حلقات البرنامج مما دفعني من جديد لتصفح موقع عمرو خالد على الانترنت وقتها مما دفعني بالتالي للتساؤل طب هل لو شخص مثلي ساعد عمرو خالد في تحضير البرنامج هل سيكون المقابل مادي ؟؟؟ ام مقابل معنوي ؟؟؟ يعني وعلى بلاطة ببلاش ولا كاش ؟؟؟ ام المقابل عند الله ... واللي عند الله ما بيضيعشي ؟؟؟ واديني باساهم في اصلاح الناس وباكسب ثواب ... طب اذا كان كده ليه موقع عمرو خالد محتاج لرعاة وممولين ؟؟؟ يعني فيه ناس بتصرف على الموقع لاسباب اعلانية وتجارية بحتة ومنهم:

- الشوربجي للايشاربات لزوم المحجبات الجداد المعروفين حاليا بمحجبات عمرو خالد المحزقين الملزقين والذين لا علاقة لهم بالحجاب الذي ولدت لاجد امي ترتديه طاعة لله وليس لعمرو خالد والحمد لله بمجرد انتهاء عصر الطاغية عبد الناصر الذي حرمه
- مكة كولا لزوم الكولا الاسلامية
- مجموعة السواني بالسعودية
- كاش يو - كارت للتسوق على الانترنت ... وبالمناسبة كاش يو على موقعها اعلان عنها فيه واحدة لابسه لا مؤاخذة بحمالات !!!

كل هذه الاسماء ترعى الموقع في مقابل وضع اعلان لها بالصفحة الاولى للموقع مع وصلة الى موقعهم بالطبع
بزنس ...
تجارة ...
توزيع ...
ارباح ...
فلوس ...
شهرة ...
مجد ...
واللي يقول غير كده اخرم عنيه !!! والاسم داعية اسلامي !!!

وعلى فكرة انا كمصمم مواقع محترف عندي فكرة عن اسعار الرعاية دي ... الحجم والمكان والوصلات واحب اقولكم انها الوف مؤلفة تصل الى مئات الالوف !!! وده في مواقع تجارية مغمورة ... ما بالكم بقى موقع عمرو خالد !!! ربنا يزيده ان كانت نعمة ... بس الله اعلم رصيده من الثواب عند ربنا ايه ...

وسألت نفسي وقتها لماذا لا يضع الموقع ملخصات او سكريبتات او تسجيلات حلقات عمرو خالد ان كانوا يعملون لوجه الله فعلا ؟؟؟ وارسلت لهم في هذا الصدد متهما اياهم بانهم لا يسعون للاصلاح لان الاصلاح المفروض مجاني وليس بفلوس ... لكن وجدت ان كل ده بيتباع بفلوس على شرايط واسطوانات من موقع السندباد مول الشهير وقتها ... لكنهم ادركوا فيما بعد ان الحلقات منشورة على الانترنت في مواقع اخرى بطريقة غير شرعية مما جعلهم يضعون حلقاتهم على الموقع هم ايضا ليس كرما منهم طبعا ... ثم ان عمرو خالد من دعاة ان نسخ الاشرطة والاسطوانات حرام ... وقد رفع دعوى قضائية على احدى شركات التسجيلات لاسباب مالية وكانت اعلاناته دائما للهجوم على تلك الشركة منشورة على الصفحة الاولى من جريدة افاق عربية التابعة للاخوان المسلمين !!! مما ذكرني بعمرو دياب في اواخر الثمانينات ومشاكله مع شركات الكاسيت ... وهنا يطرح سؤال نفسه : ما الفرق تجاريا ... واكرر تجاريا وليس اخلاقيا او دينيا ... بين عمرو خالد وعمرو دياب؟؟؟ ... الاجابة: لاشيء ... كلاهما يسعى الى الربح ... عمرو دياب بشكل معلن وعمرو خالد متسترا في عباءة الاسلام !!! فتكون الكفة راجحة لعمرو دياب على الاقل لانه صريح ولا ينكر ذلك ... ولو عمرو خالد يسعى الى الاصلاح فالاصلاح اولى ان يكون مجانا ومتوفرا للجميع !!!

ثم يصلني سؤال من الشيطان اللي راكب على وداني: طب يا وائل اهه الحاجات دي بتكسب فلوس ياما وشهرة ومعجبين ... ما تخليك انت كمان مع الرايجة وبلاش تعوم ضد التيار وتكون عداوات واحقاد ... هو انت يعني ياخويا اللي ها تصلح الكون ... واهو تستفيد كده بدل ما انت حالك ما يسرش ... اجابة: انزل من على ودني يا خبيث !!! اعوذ بالله منك ومن نفسي الامارة بالسوء واعانني الله عليكما ... انا لا شيخ ولا عاوز اكون شيخ ولا استطيع تحمل تلك المسئولية اللتي يستهين بها كثيرون ويتخذونها مصدر للاسترزاق ... واي طرح عندي انا شخصيا بغرض الاصلاح لا ينطوي على تغيير سياسي وفكري واداري ويتجنب المسائل الشائكة بغرض السلامة كالاصطدام مع الحكومة والنظام والحكام العرب بل على العكس يخطب ودهم ... وما الى ذلك يجعل المضمون فارغا تافها غير ذو قيمة ... حالما في دنيا تخيلية افتراضية يوتوبية ولا يصلح للتطبيق !!! ويبقى لعب عيال وسفسطة وكلام فارغ لملء شرائط واسطوانات لاغير !!! وبيع يا صبري ...

وحقيقة اصدقكم القول لا اعرف ما نوع الهبل الذي حط عليا وجعلني اقدم المشورة لشخص مثل هذا ... فهو لا يصلح اطلاقا للدعوة ولن ينفع معه مشورة ولا تعديل ولا تزويق لاننا لا نستطيع ان نحلب الثور لانه ببساطة ثور وان اصررنا على تزويقه بالورود والازهار واعطاؤه الهرمونات الانثوية فهو يظل ثورا وان نصر على ان نحلبه مع كل هذا يبقى احنا بقى لا مؤاخذة يعني وبلاش اقول كلام ابيح ...

دعوني اولا ارد على بعض الاخوة الذين يدافعون دفاعا عاطفيا عنه وليس دفاعا عقليا او الحجة بالحجة ... فاولا لازم كلنا نتفق ان عمرو خالد مش عالم دين ومش فقيه ومش مفتى ... اظن لا خلاف على ذلك ولا تجني ... ثانيا عمرو خالد قال عن نفسه انا - قصاص - وبعد قليل ها اتوسع فى الحتة بتاعة قصاص دى وياريت تقروا كلامى كله لحد الاخر مهما كان طويل المرة دي

اول تحفظاتى على عمرو خالد هو انه بيسعى للاصلاح على المستوى الفردى وليس على مستوى المجموع وده خطا لانه بيسبب السلبية وان كل واحد يبقى متدين بس مع نفسه بدون هدف جماعى او خطة يسعى الجميع لتحقيقها فى اطار الدين وربما حاول هو ان يتجاوز هذه السلبية فى دروس حتى يغيروا ما بانفسهم فى فترة الحرب ضد العراق حتى ان البعض اعتبره تحول سياسى وبداوا فى مهاجمته على هذا الاساس ثم في صناع الحياة بعد ان وصله انتقادي هذا من قبل

وعمرو خالد لا يقدم للشباب الا اسلام مستوى كيندر جارتن ... مستوى مجلة ميكي وسمير ... قشور وامور ثانوية وليست جوهرية ... فلن تجده ابدا يتكلم في عقيدة التوحيد ولا نظام الحكم الاسلامي ولا مسئولية الحاكم عن الرعية من ناحية توفير العمل والمسكن والزواج ومساعدة المحتاج وما هو الجهاد في الاسلام والفرق بينه وبين الارهاب ... وحرية الاجتهاد في الفقه والتسامح مع غير المسلمين في المجتمع والتعامل مع الدول الاخرى ... الخ من الامور الجوهرية التي يجب ان يعرفها الشباب عن دينه حتى لا تلتبس عليه الامور وينحرف ... لكن يبدو ان عمرو خالد هو مكتب التجنيد او هو مصنع الاكياس الفارغة ... ينتج للمجتمع شباب كالاكياس الفارغة مكتوب عليها من الخارج مسلم ... يستلم تلك الاكياس اي كان ليضع فيها ما يريده من خير او شر ... ويتخرج الشباب من حضانة عمورة ليدخل مدرسة الاخوان المسلمين الابتدائية ... ثم مدرسة الوهابية السلفية الثانوية لتعدهم للالتحاق بجامعة بن لادن ... كلية القاعدة ... قسم الانتحار الجهادي وربما حصلوا على منحة للدراسة في افغانستان او العراق في معهد الزرقاوي الاستراتيجي ... وربما هذا هو سبب التواطؤ الاخواني والسلفي مع عمرو خالد برغم انهم يعرفون كمية اخطاء عمرو خالد ... وانه لا يصلح بتاتا للدعوة !!!

ايضا هجومى لانه ظاهرة وموضة والظاهرة الاعلامية او الموضة ليست من طبيعتها الثبات وان كانت فى مجتمعاتنا الشرقية تعمر اطول من المجتمعات الغربية لكنها تنتهى فى فترة ما يعنى مثلا عندنا عمرو دياب موضة بقاله عشرين سنه اهوه بس لازم ها تيجى فترة ينتهى موضته مهما كنا عشريين معاه زى فى الغرب كيفن كوستنر كان موضة فترة وماحدش بيسمع عنه دلوقتى ودلوقتى فيه غيره وغيره كل سنة وسبق عمرو خالد البحار ياسين رشدي وداعية الفتنة الطائفية عمر عبد الكافي وموضتهم اهي بطلت !!! ... والدليل على ان عمرو خالد موضة انك تدخل اى موقع شبابى بتلاقى احدث اغانى ام بى ثرى بجانبها احدث رينجتونز للموبايل بجانبها احدث لوجوهات نانسي عجرم وهيفاء وهبي وبجانب كل ذلك احدث دروس عمرو خالد !!! ده علشان الموقع بيرضى كل الاذواق طبعا واللي تكسب به العب به !!!

ده الى جانب باروكة عمرو خالد الشهيرة ... فعمرو خالد في الحقيقة اصلع شائب الشعر ... لكنه بعلمه الغزير لم يعرف ان الباروكة حرام فارتداها وصبغ ما تبقى من شعره بالرغم من ان اي طفل يعرف ان الباروكة والصبغة حرام للنساء ... فما بالك بالرجال ... ولكن داعيتنا القدير ابى الا ان ينافس سمير غانم وسمير صبري ووحيد سيف ... ربما كانت الباروكة والصبغة من شروط صفاء ابو السعود علشان يطلعوه في قنوات ارت جنبا الى جنب مع السالف ذكرهم من لابسي الباروكات وان كان في تخصص مختلف ... لكن الحقيقة عمرو خالد طلع مش بيطلع بس في قناة اقرا ... ولكن بلغت حظوته عند صفاء ابو السعود ان جعلته مدير ادارة تطوير البرامج بتاعة الآرت كلها !!!

لكن بلاش نظلم صفاء ابو السعود يمكن هو اللي بيعمل كده لزوم الوجاهة علشان يعجب البنات والستات اللي هما اكثر متفرجينه خصوصا لما يقعد يتزلف لهم ويتمحلس لهم ويلعب لهم على الوتر الحساس اللي بيحبوا يسمعوه عن انهم ازاي مهمين للمجتمع خصوصا في مجتمع يمتهن كرامة المراة ولا يعطيها حقوقها فيكون عمرو خالد هو المخدر والمنفس لفتاة يقمعها اهلها او زوجة يهملها زوجها فتجد اهميتها المنسية على لسان عمرو خالد ... ده طبعا الى جانب ذقنه الحليقة وخدوده اللي بتلمع تحت الاضاءة بفعل مستحضرات التجميل ... واسمحوا لي ان اقتبس هذه الجملة التي قرأتها في مكان ما ونقلتها ولا اتذكر كاتبها وارجو ان يلتمس لي العذر ويقول عن عمرو خالد : نراه على شاشة التلفزيون و لم نعرف من هو فقد كان يجلس في الظلام معطيًا ظهره للحضور و نور يتسلل من بعيد مع موسيقى ناعمة ثم استدار شيئًا فشيئًا و وضعته أضواء الكاشفات في هالة من النور.. إخراج مسرحي من الدرجة الأولى ... وبالمناسبة عمرو خالد شوهد اكثر من مرة ذقنه نابتة اي انه ليس امرد ولا عنده عذر كما يدعي ... لكن مش ده الموضوع علشان ما ابقاش انا كمان هايف زي اللي بيهاجموه علشان لابس بدلة ولا حالق دقنه ... اطلاقا ...

لكن تعالوا كده نشوف القرضاوي باشا حبيب الكل هو كمان افتى و قايل ايه :
بهذا نعلم حكم ما يسمى " الباروكة " وما شابهها، وادعاء أنها مجرد غطاء للرأس كذب وتضليل يخالف الواقع، فأغطية الرأس معلومة بالعقل والعرف، وإنما هذه زينة وحلية أكثر من الشعر الطبيعي نفسه، مع ما فيها من الغش والتزوير من ناحية، والإسراف والتبذير من ناحية ثانية. وكل هذه مؤكدات للتحريم.

نسيبنا من القرضاوي ونخش بقى على الكلام الجد ... كلام رسول الله صلى الله عليه وسلم الذي ليس بعده كلام
فعدما رأى رسول الله باروكة قال: إنما هلكت بنو إسرائيل حين اتخذ هذه نساؤهم - البخاري
وحديث آخر: لعنَ الله الواصلة والمُستوصِلة - مسلم
وحديث ثالث لا اذكره بالضبط عن النهي عن صبغ الشعر بالاسود: ومعنى الحديث : حمروا وصفروا ولا تكونوا مثل اهل الكتاب او مثل اليهود ... اين انت يا من تدعي انك داعية الان !!!

برضه تلاقى اعلان بتاع زيت ولا بتاع ماعرفشى ايه بيقولك اشترى عبوة الزيت الفلانى ومعاها شرايط عمرو خالد !!! وموقع عمرو خالد نفسه فيه اعلانات بتاعة شركات - مش موقع دينى يعنى وكمان بيستضيفوه فى برامج الترفيه على الفضائيات يعنى الكرسى اللى عمرو خالد قاعد فيه ده مثلا كان الاسبوع اللى فات او الاسبوع اللى بعده قاعد فيه واحدة هشكة ممثلة نص كم او رقاصة ونفس المذيع والمحاور اللى بيكلم عمرو خالد هوهو نفسه اللى كان بيسال الهشكة دى مين احلى راجل عاجبك فى البلد ومين المزه اللى بتنافس جمال اهلك !!! وللاسف هذا البرنامج كان على قناة تابعة للمتعصبين الموارنة اللبنانيين ... فلماذا النزول الى هذا المستوى الا من اجل الشهرة والدعاية والانتشار؟؟؟ ... كذلك شريط فيديو له مع سهير البابلى وعليه صورتهما يباع فى الاسواق زى ما تكون مسرحية فهل ده لخدمة الدعوة ؟؟؟ اى ان العملية كلها بزنس وترفيه ده غير الفتاوى بان نسخ الشرايط والاسطوانات حرام يعنى المسالة سلعة ودعاية وترفيه

و ده حتى على عكس سابقه فى الموضة عمر عبد الكافى شيخ الفتنة الطائفية الشهير اللي كان بيقول حقوق الطبع لكل مسلم وكان بيكتب على شرايطه تهادوا تحابوا بس ده موضوع تانى لان عمر عبد الكافى كان بيجيله تمويل من الخارج ... اللهم لا حسد ... لكن كان موضة وانتهت وقبليه الشيخ كشك وغيره وغيره

والمثال الجيد فى الموضوع هو الشيخ الشعراوى حيث كان يسمح لاى كان بطبع كلامه ونسخ شرائطه ورفض ان تحتكر كلامه اى جهة حتى لو كانت حكومية ورفض اى اغراء مادى او مكسب من وراء ذلك ولكن الامر تغير بعد وفاته رحمه الله حيث ان ابناؤه حريصون كل الحرص على اكبر مكسب مادى مما تركه والدهم سامحهم الله !!! وقد اشتكت لي شابة تسكن بالقرب من قبر الشعراوي وقالت لي انهم حولوا قبره الى ضريح فاخر وهائل ومزار بالمخالفة لما اراده هو رحمه الله وبالمخالفة للشرع الحنيف فيما يختص بالدفن وقد سمعت عن اقامة مولد له كل عام !!! رحم الله الشيخ !!!

والغريب ان البعض يتهمون الحكومة المصرية انها من نفت عمرو خالد وطردته خارج مصر ... وانا بدوري انفي هذا الشرف عن الحكومة المصرية ولنقرأ سويا ما يلي لنعرف من وراء طرد عمرو خالد بعد ان ثبت جهله وفتنته:
- يقول الدكتور عبد المعطي بيومي العميد السابق لكلية أصول الدين وعضو مجمع البحوث الإسلامية في الأزهر عندما سئل عن عمرو خالد: " يجب أن يتوقف عن الدعوة حتى يقوم بدراسة الدين دراسة منهجية وفق خطة منظمة كما يحدث للدارسين في المعاهد والكليات الأزهرية ، أما من يحاول الدعوة بغير هذه الدراسة فهو دخيل ومتكلف لأن الدعوة تحتاج الى فهم الإسلام فهمًا حقيقيا ولكن أن يحترف الدعوة رجل يقول أنا داعية ولست مفتيا فقد جعل الدعوة قطعا متناثرة يأخذ منها ما يشاء أو كأن الدعوة أصبحت مجرد تمثيل"، ثم تابع حديثه فقال: " فهذا الاسلوب يذكرني بمن يروي للناس في الأرياف قديما بعض روايات لسيرة أبي زيد الهلالي فيسلي الناس ويشدهم بحكاياته"
- أما الدكتور عبد الله النجار الأستاذ في كلية الشريعة والقانون وعضو مجمع البحوث الإسلامية في الأزهر فأجاب عندما سئل عن سر انبهار الشباب والفتيات بأقوال عمرو خالد قائلا:" يأتي هذا ضمن ظاهرة التمرد الفكري والاجتماعي التي تسود المجتماعات الإنسانية ومنها المجتماعات الإسلامية حيث يتم الخروج عن المألوف في مجال الدعوة"
- أما الدكتور أحمد عمر هاشم رئيس جامعة الأزهر فقد أكد أن الدعوة الآن أصبحت مجالا مفتوحا لكل من هب ودب لذلك فظهور داعية من خارج الأزهر مثل عمرو خالد أمر ينبغي الوقوف عنده ومراجعته ، يراجع مجلة "لها" العدد 127 بتاريخ 26/2/2003.

نيجى لموضوع القصص والكلام هنا لبعض رجال الازهر اللى بيقولوا عليه ان بعض ما يقوله يعتمد على مرويات ضعيفة واسرائيليات واحاديث موضوعة وانهم هم اللذين ضغطوا على الحكومة لمنعه من القاء دروسه

وهنا انا ليا ملاحظة شخصية قبل ان اكمل كلام العلماء اللى عندهم العلم والخبرة وهى نوعية القصص اللى بيحكيها ولا اقصد بذلك سير الصحابة او السيرة النبوية ولو انى ساذكر تحفظات العلماء بعد قليل ولكن قصص العصر الحديث اللى فيها جينز وموبايل ودش وعربيات ونوادى واللى دايما يقول صديق قاللى او جار قاللى او فلان حكالى وهى قصص ما انزل الله بها من سلطان وماعرفشى جابها منين واشمعنى هو اللى بتوصله القصص دى واحنا عمرنا ما سمعنا عنها لا فى الجرايد ولا التلفزيون ولا صفحة الحوادث ولا غيره وهاخد هنا قصتين على سبيل المثال لا الحصر:

القصة الاولى بتاعة البنت اللى كانت نازلة تشترى جينز وجارتها خدتها درس اسلامى وبعدين البنت اتاثرت وجابولها طرحة وعباية وبعدين نزلت الشارع عربية خبطتها والقصة موجودة فى درس الحياء رقم اربعة او الشريط الرابع علشان بس فيه ناس كتيرة بتقولي انت بتحكم على الراجل من غير ما تسمعه !!!
والقصة التانية بتاعة الراجل اللى ماعرفش مين كان عيان وهو ماعاهوش فلوس يجيب دكتور لكن علشان هو كويس وابن حلال ربنا بعتله دكتور غلط فى العنوان وكان اصلا رايح لمريض تانى وخبط عليه بالصدفة ... الخ

الحقيقة كنت اتمنى ان يكون الواقع بالفعل مثل قصص عمرو خالد كده ويكون فيه معجزات بتحصل فى القرن الواحد والعشرين على الاقل كان عمرو خالد ها يلاقى قصص كتيرة يحكيها زى مثلا ان اليهود جالهم فيروس مش بيقتل غير اليهود وخلص عليهم كلهم وفلسطين رجعت لاصحابها ... لكن الواقع غير كده لان كلنا عارفين ان اليهود بيطوروا قنبلة جينية تقتل العرب بس وده بالعلم مش بالحواديت والخرافات والاساطير والمعجزات المزعومة واحنا مع ذلك لسه قاعدين نسمع حواديت ابله فضيله ... قصدى عمرو خالد ... او ممكن قصة تانية ان ربنا ارسل جنود وملائكة حاربوا فى العراق وهزموا الامريكان وطردوهم بفضل الايمان والتقوى ... ودي فعلا حصلت وسمعنا خرافات عن الكلاب السوداء والعنكبوت اياه والعواصف الالهية الترابية وكلها قصص حشاشين ليس فيها من الحقيقة شيء على خلاف الاحتلال الامريكي الذي هو امر واقع وحقيقة لا شك فيها ... لان ربنا مش بيساعد اللى مش بيساعدوا نفسهم ونوعية القصص دى بيسموها فى الغرب - اربان ليجيندس - او اساطير مدنية او اساطير مستحدثة ودى خطورتها كبيرة جدا ... في القرن الواحد والعشرين ما زال العرب ينتظرون الطير الابابيل والريح الصرصر العاتية !!! بالطبع لا شيء يصعب على قدرة الله ... لكن هل نستحق فعلا معجزات الله هذه ؟؟؟ ام نستحق ان يحيق عذابه هذا بنا نحن وليس اعدائنا !!! ومازلنا نترك شبابنا نهبا لمروجي الخرافات كعمرو خالد فنخسر جيلا جديدا ...

وانا هنا لا اشكك فى نية عمرو خالد ببساطة لان الله اعلم بها وهل هو يبغي شهرة ام زعامة ام مال وجاه وان كان كل ذلك قد تحقق له ومع ذلك مش عاوز يعتزل بقى وقاعد يقرفنا لسه او ان يكون حسن النية وهو احتمال ضعيف ولكن ايضا حسن النية لا يكفى هنا لان الدبة قتلت صاحبها من كتر الحب والقطة اكلت اولادها خوفا عليهم ... فبالفعل توجد خطورة وهى زرع السلبية والتواكل على الله وليس التوكل على الله فالتفكير بعقلية المعجزات وان ربنا معانا بمناسبة ومن غير مناسبة خطا يعنى الواحد ما يشتغلشى وما يفكرشى وما يجتهدشى علشان ربنا معاه؟ يعنى لا نتسلح ولا نقوى اقتصاديا وعلميا ومع ذلك ها نقهر الاعداء علشان ربنا معانا؟

يعنى للاسف بالفعل كنا كلنا بما فيكم انا عندنا الاحساس ان العراقيون سينتصرون واعتمدنا على شجاعتهم وايمانهم ودعاوى الاتقياء فيهم ... لكن الواقع انهم انهزموا ولم تتحقق المعجزة التى توقعناها برغم ان المعجزة المزعومة حققها الملاحدة الشيوعيون فى فيتنام وهزموا الامريكان بقوة ايمانهم بشىء مغلوط وهو وطنهم والايديولوجية الشيوعية ولكننا فشلنا مع ايماننا واسلامنا وده مش علشان احنا ايماننا غلط لا علشان احنا تواكلنا ولم نتوكل على الله وناخذ باسباب النصر ... اذا هذه النوعية من القصص مدمرة للشباب !!!

لقد اراد الله لليهودية والمسيحية ان تقرب الى الناس بالعاطفة لا العقل لان تلك كانت طبيعة الزمان وقتها ... فجعل موسى يشق البحر ويرمى عصاه تتحول حية ويدخل يده فى جيبه تخرج بيضاء وكان المسيح يحيى الموتى ويشفى الاعمى والابرص ولكن لان العصور دى كانت دى طبيعة عقلية الناس فيها ... ولكنه اراد للاسلام الدين الخاتم والاوحد حتى اخر الزمان ان يقترب الى الناس بالعقل لانه الدين الخاتم اللى مش ها ييجى بعده دين فلم يكن للرسول قدرات مثل موسى وعيسى ولو اراد الله لاعطاه اكثر منهم
ولكننا وجدنا الرسول بشر يتعذب ويهزم فى الحرب وتكسر له سن في غزوة احد ويسالم ويهادن في الحديبية ويسحب جيشه في مؤتة !!! ولكن كان معجزته القران كلام الله المقنع والمعجز لانه يخاطب العقل والفكر ولم يجعل رسوله يخاطب الناس بالسحر والمعجزات ... وكلامي هذا موجه الى بهاليل النقل ...

نيجى بقى لكون عمرو خالد قصاص وهل له القدرة على ان يفرق الغث من السمين وان يخرج السم من العسل نجد انه لم يتتلمذ على احد العلماء وليس متفقها فى الدين وبالتالى لا يستطيع ذلك فربما يقول حقا يراد به باطل وربما كلامه ظاهره الرحمة وباطنه العذاب وليس عن قصد لا سمح الله ولكن عن قلة معرفة وخبرة مع توافر حسن النية والقدرة على الاقناع والكاريزما الهتلرية الناصرية ... مخلوطين بالجهل الاكيد ... فالمرويات ربما يكون ظاهرها الخير ولكن قد يكون فيها شيئا مدسوسا او اسرائيليات لا نلاحظها وتترسب فى العقل الباطن

وكلنا يعرف ان اليهود هم رواد هذا الاسلوب وقد قامت دراسات على هذا الموضوع فى العصر الحديث فى المانيا النازية وامريكا والاتحاد السوفيتى حيث كان الشيوعيون مثلا يندسون بين المسلمون وينشرون الشيوعية فى غلاف دينى وهو محاربة الاستعمار والاستغلال والغرب ... ومثلا فريق البيتلز الغنائى اعترف ان له اتجاهات سياسية معينة وانهم كانوا يدسون رسائل مشفرة فى موسيقاهم لا يفهمها الا العقل الباطن ... وبالفعل تكون لتلك الرسائل تاثير على المستمع مثل دس كلمة الثورة بطريقة معينة داخل اغنية ما بحيث تتكون الصورة والفكرة بعد انتهاء الاستماع للاغنية ككل

كذلك الامر بالنسبة للمرويات والاسرائيليات تظهر للناس انها اسلامية وبتقول كلام كويس لكن فى النص فيه رسالة مختبئة بتقول اليهود مثلا ولاد حلال

زى مثلا حالة لاحظتها واكتشفتها لمسلسل كوميدى امريكى اسمه كلولس بيحكى قصة بنت امريكية جميلة شقراء عنيها ملونة البنت بقى طيبة وحنينة وبتحب كل الناس وبتساعد الفقراء وبتساعد زمايلها اللى فى المدرسة لو عندهم مشاكل وجايبينها من عائلة غنية وابوها محامى وعندهم فيلا فى بيفرلى هيلز وعربية فخمة ... حتى تتر المسلسل اغنية بتقول انها نموذج للحب والايثار وان لو معاها شىء مش ها تتردد وتديهولك ... ولكن المفاجاة اللى صدمتنى فى احدى الحلقات انهم كان عندهم حفلة فى المدرسة وهي حفلة لكل الاديان الكريسماس ورمضان المسلمين وعيد الهانوكاه اليهودى ففوجئت انها المسئولة عن الفقرة اليهودية فى الاستعراض لانها ببساطة يهودية !!! يعنى كل المسلسل ده اللي تابعته اللى بيمدح فى طيبة ورقة وجمال البنت دى اتاريه بيمدح فى اليهود وكرمهم وايثارهم وانهم ناس عاديين بيشتروا فيلات بيفرلي هيلز ويعيشون في بحبوحة ومش بيستخسروا فى نفسهم ولا فى حد حاجة ... ويستمر المسلسل بعد كده فى انه يرميلك ايحاءات علشان يفكرك دايما ان شير دى يهودية فمثلا بعد ان تعرضت شير لموقف عصيب بتقول لابوها: عارف انا لو ما كنتش يهودية كنت دخلت الدير !!! السم فى العسل زى ما بيقولوا !!! مع ان المسلسل ده كان في الاصل فيلم بطولة اليشيا سيلفرستون كانت البطلة شير فيه مسيحية ومعلقة الصليب كمان طول الفيلم !!!

نرجع بقى لعمرو خالد فعمرو خالد يكثر من قول انه اول من تنبه الى كذا وكذا فى الدين ودايما تلاقيه بيحلف يقولك والله العظيم والله العظيم زى ما يكون مش واثق من نفسه ودايما يقول ان مجلسه بتحفه الملائكة لانه مجلس علم مع انه مجلس مختلط اكثر من مجلس الكنيسة والبنات فيه لابسة ما لن يسمح لهم بدخول كنيسة به وكان لي صديق بيروح يقابل صاحبته في دروس عمرو خالد!!! يبقى ملايكة ايه بس !!!

كمان عمرو خالد بيغلط فى اسماء العلماء مثل النَسائى بفتح النون وهو بيقولها بكسر النون كانه ينسبه للنساء وليس الى بلده نسا في خراسان كما هو معروف !!! يبقى ده اخذ علمه منين ؟؟؟ وتتلمذ على يد من وسمع من فم من ؟؟؟ ومن المسئول عن اطلاقه علينا بجهله هذا !!! وايضا اسماء الصحابيات مثل ام حرام بنت ملحان بيقول عليها ام حيرام مع ان حيرام كان ملك جبيل بلبنان ... وهو يتكلم فى أمور لازم يكون فيها فقيه وعالم تاريخ وعالم حديث ولغة وهو ليس اى مما سبق اطلاقا !!! بل انه حريص فقط على ان يضع فى سيرته شهاداته الجامعية والنوادى التى اشترك فيها وهواياته الرياضية ووظائفه السابقة في مجال المحاسبة وهى ليست من مؤهلات الداعية !!!

ومن نوادره انه يقول ان الله يسهر منتظرا توبة العبد حاشا لله الذي لا تاخذه سنة ولا نوم فكيف يسهر وهو الذي لا ينام !!! كمان انه يقول ان ابليس لم يكفر!!! وان ارض المسجد الاقصى هي مكان بيت رجل يهودي !!! كما روى حديث عن رسول الله لا اصل له حيث قال في درس له مسجل في المدينة الرياضية ببيروت ان رسول الله صلى الله عليه وسلم قال: بلغني أن الله يباهي بكم الآن الملائكة !!! الله يباهي بالصحابة الملائكة ؟؟؟ ياللعجب الذي لم نسمعه من قبل !!! وزعم ايضا ان النبي قال ان الناس ستنادي وتقول اين ربنا ليحاسبنا !!! مش عارف بيجيب الكلام ده منين !!! ثم يفتكس عمرو خالد حديثا نبويا في كتابه اخلاق المؤمن فيقول: انما العلم بالتعلم - والى هنا الحديث صحيح - لكن يضيف اليه عمرو باشا التالي: وإنما الحلم بالتحلم وإنما الصبر بالتصبر !!! مش عارف جاب الكمالة دي منين ؟؟؟ يمكن من كتاب ابلة نظيرة ؟؟؟

طب اسمعواد دي علشان تضحكوا بجد ... عارفين بكة اسمها كده ليه ؟؟؟ عمرو خالد بيقول من كثرة البكاء فيها !!! اي والله والكلام ده في كتاب عبادات المؤمن بتاعه الذي ما زال يباع !!! ... وفي شريط واحد وهو شريط التوبة يفتي عمرو باشا خالد بان النظرة المحرمة من الكبائر ثم يعود فيعدها من الصغائر ... في نفس الشريط !!! حيرتنا يا راجل طب حتى راجع اللي سجلته بدل العك والجهل ده !!!

ثم يجتريء عمرو ايضا على الاحاديث القدسية بالمرة كمان وكانه لم يكفيه الاحاديث النبوية ... ماهي زاطت وهاصت ومحدش عارف يلمه ... ويخترع لنا حديث في كتاب اخلاق المؤمن يقول: ‏عبدي ما غرك بي عبدي أظننت ‏أنك ستقابلني أم نسيت ذلك اليوم !!! ... وفي محاضرة له عن القدس زعم ان المسلمين صلوا وقبلتهم بيت المقدس 13 سنة والحقيقة 16 شهر فقط !!! غلطات عيال صغيرة وعيب اوي يعني من واحد بيزعم انه داعية !!! كما يعتبر ان الذكر فرض عين !!! وانه ما ينفعشي تقول استغفر الله مرة واحدة !!! ... وكمان يقول ان الناس لازم تتوب والذنب لسه طازة والا التوبة ما تنفعشي ... يظهر بتحمض يا عمرو ولا ايه ؟؟؟ طبعا لا ننسى مقولته الشهيرة بان خمسة مكروه يساوي حرام !!!

والنبي يا جماعة حد يقول للراجل ده كفاية كده بقى ... لم جهلك بقى يا اخي وروح ... ده انت شخرمت الدين خالص ... يا سيدنا انت ما تنفعشي !!! هو بالعافية ؟؟؟ ولا انت عاجبك نفسك واعجاب الجهال الذين اضللتهم بك ؟؟؟ هاتروح فين من ربك يا شيخ !!!

وقد حكى عمرو خالد هذه القصة: سرق أحد الرجال فأخذوه إلى سيدنا عمر بن الخطاب فقال الرجل لعمر أقسم بالله هذه أول مرة فقال عمر كذبت إن الله لا يفضح عباده من أول مرة !!! هذه القصة ليست صحيحة لا سندًا و لا متنًا فهي مكذوبة و فيها مخالفة صريحة للشرع و الدليل على ذلك أن إبليس كان مؤمنًا و عصى الله بالتكبر على أمر الله و كفر باعتراضه عليه و هذا أول كفر لإبليس و مع ذلك الله فضحه من أول مرة و الأمثلة على ذلك كثير ... كما يفتي عمرو خالد الذي ذكر اكثر من مرة وحلف على المية تجمد انه مش مفتي ان صلاة النوافل تقوم مقام القضاء !!! وقال عمرو خالد في مقابلته مع القناة المسماة إقرأ في مطلع يوليو 2002 مع برنامج يسمى مجلة المرأة المسلمة ورداً على مكالمةٍ هاتفية قال ما نصه: مش عايزة تتحجبي مفيش مشكلة ولكن احذرى الملابس الضيقة !!! اشطة يابا يعني مفيش بعد كده تسامح !!! ظلمتوا الراجل لما سميتو حجاب البنات حجاب عمرو خالد !!! عمورة اهه بحبوح خالص وبيقولكم مش ضروري الحجاب اصلا !!! وقد حكى لي احد الاصدقاء انه شاهد برنامج لعمرو خالد وقد جعل من أحد الضيوف يتحدث عن خطيبته و كم هى شيطانه على الهواء مباشرة !!! فهل هذا يصح او يليق !!!

ثم تجد عمرو خالد الذي ينعته البعض بالمستنير والمثقف الفاهم الواعي والعصري غير المتطرف يحرم مالم يحرمه حتى غلاة السلفية والوهابية حيث يحرم التبرك بقبر النبي او طلب قضاء حاجة دنيوية منه او حتى الدعاء لله امام قبر النبي !!! ما اسانيده ؟؟؟ الله اعلم !!! ثم يوجب على المسلمين ختم القرآن وهو مالم يوجبه الشرع من قبل اطلاقا !!! ثم يحاول عمرو خالد ان يتنطط على الحبل في سيرك زغلول النجار ويتحدث عن الاعجاز العددي في القران فيقول ان لفظة رجل ومشتقاتها وامراة ومشتقاتها وردت 24 مرة والصواب رجل 56 وامراة 26 !!! كلمة شهر 12 والصواب 21 وكلمة يوم 365 والصواب 443 ... وكل حساباته غلط مع انه في الاصل محاسب ... لكن من يضل الله فلا هادي له !!!

اما ثالثة الاثافي ولا ماعرفشي بيقولوها ازاي علشان محدش يتريق عليا - هي ان عمرو خالد باشا بيقول ان تفسير ابن كثير تفسير بسيط ... اما اللي عاوز بقى التفسير التمام فيروح يقرا في ظلال القرآن !!! طبعا كلنا عارفين ان في ظلال القران بتاع سيد قطب صنم الاخوان الاكبر ومبتدع التكفير والهجرة والذي لم يصل صلاة الجمعة وحرمها حتى موته لانه يزعم انها لا تجوز لعدم وجود دولة خلافة !!! ثم يثني عمرو بيه على كتاب التصوير الفني في القرآن لسيد قطب ايضا !!! يا زين ما اخترت يا عمورة !!! مش باقولكم مكتب تجنيد للاخوان !!! طبعا فيه ناس كتيرة بتقرا الكلام ده ومش ها يعجبهم اني كمان مش عاجبني سيد قطب ... ولهؤلاء اقول اصبروا ... فاحتراما لسيد قطب يوازي احترامي تماما لعقلية هتلر وستالين وموسوليني ساخصص له مقال لوحده ان شاء الله !!! فاصبروا صبرا جميلا حتى اريكم اجتهادات سيدكم قطبكم يا من حرمتم الاجتهاد على المعتدلين والمستنيرين !!! وتعاطفتم مع الجهلاء السطحيين امثال عمرو خالد ...

وهو واعني عمرو ... يركز مثل سائر القصاص على المعجزات لجذب الاذهان وتكثير الحضور ولا يتحرى الدقة فى مصادره وليست لديه القدرة على انتقاء الصحيح من السقيم وهى قدرة يصعب ان تتوافر لديه لانه لم يدرس دراسة شرعية سليمة كمان التبسط الزائد وسرد الانحرافات اللى بيعملها الشباب قد يكون مضرا فهو يتكلم عن مارينا وجزيرة الجونة ومطعم كارتيجيانو والانترنت والحفلات وفيه من الشباب ناس ما تعرفشى اصلا الحاجات اللى هو فتح عينهم عليها دى وايضا ليه كلام عامى كده مش ظريف على الودان وقد لا يكون صحيحا ان يقال من الناحية الشرعية مثل : ضعفنا يا رب.. محتاجين لك يا رب.. ماتسيبناش للدنيا.. ده بدل ما يدعوهم وهم الشباب بالذات للسيطرة على الدنيا واخذ زمام المبادرة فى يدهم بيعلمهم دعاء العجائز اللذين لا حول لهم ولا قوة !!!

كمان للاسف ودى حاجة انا اكتشفتها قريب وهي ان مش عمرو خالد اللى بيعد دروسه ومحاضراته حاليا ولكن اصبح عنده طاقم كامل من الشباب يعدونها له ولا واحد فيهم ازهرى او حتى متعلم تعليم شرعى !!! كما انه عندما يتكلم مثلا عن العلاقة بين الشاب والفتاه لا يذكر احكام الدين الجازمة والحلال والحرام المعروف ويستبدله بكلام مائع لين حتى يجتذب المستمع اليه اجتذابا عاطفيا غير واع واللذى يحدث فى الحقيقة ان المستمع يعتمد على عمرو خالد كمرجعية ويبتعد عن القران والسنة !!! وانا شخصيا كثيرا ما اسع شاب او فتاة يقولون: الشيخ عمرو خالد قال كذا وكذا وكيت !!! الشيخ عمرو خالد ؟؟؟!!!

وده حذر منه الامام الغزالى الكبير رحمه الله علشان كده تلاقى معظم اللى بيسمعوه اى نعم بيصلوا ويصوموا واخلاقهم اتحسنت لكن كل واحد برضه ليه البت بتاعته والبنت لسه ليها صاحبها بل والجراة انه بياخدها الجامع او يروحوا يصلوا العيد سوا كانها مراته او خطيبته والنماذج دى من مستمعى عمرو خالد انا شفتها بنفسى ومنهم اصدقاء وزملاء!!! ... عادى بقى ماهو حتى دروس عمرو خالد مختلطة !!! ممكن الحبايب يتقابلوا فيها كمان !!! وده كان بيحصل فعلا كما ذكرت !!! رايحة فين يا بت ؟؟؟ رايحة درس عمرو خالد يا بابا ... بارك الله فيكي يا بنتي !!!

كمان القران بيقول لا تزكوا انفسكم واللى بيسمعوا عمرو خالد اكيد بيسمعوا هو بيمدح ويفخم فى نفسه ازاى ومافيش داعى انى اذكر امثلة ... ولو انى بالفعل ذكرت فى مكان ما من هذا المقال سابقا ... ده حتى موقع عمرو خالد بيركز على المقالات اللى بتمدح فى عمرو خالد زى مثلا فلان قال كذا على عمرو خالد وانيس منصور قال ده كويس!!! انيس منصور اللى الاسلاميين ياما كفروه وقالوا عليه علمانى - مع تحفظى طبعا على كلامهم - اصبح الان مرجعية وبيفهم مين الكويس ومين الوحش مع ان المفروض الموضوعية تتطلب نشر الاراء المضادة لعمرو خالد وتفنيدها بالحجة اذا كان باستطاعة عمرو خالد اصلا هو او اتباعه تفنيدها والرد عليها !!!

وعن القصاصين يقول احد الشيوخ لا يحضرني اسمه:
. من آثار دعوة عمرو خالد ، تقديم كثير من الناس أسلوبه الرخيص على الدعوة بكتاب الله تعالى وسنة رسوله - صلى الله عليه وسلم - بحجة أن الناس لا يهتدون إلا بمثل هذا الأسلوب فكان الإغراق في القصص بغثها وسمينها ، والإيحاءات العاطفية المصطنعة عمدة كُل من تصدر المجالس والمنابر من هؤلاء القوم ؛ بل إن جُل هؤلاء الذين ابتليت بتصدرهم الأمة قوم اقتحموا كتب السيرة والتأريخ ، فخبطوا فيها خبط عشواء ، وأصبحوا كحاطب الليل لا يدري ما الذي بيده : هل هي خشبة أم أفعى ، فيلملمون الأوراق ، ويجوبون بها الآفاق ، ويجمعون من حولهم العامة ، و بعض من تلبسوا بلبوس العلم وهو منهم بريء .
وأما الذين ينبرون لنشر أشرطة هؤلاء فحجتهم أن الناس بحاجة إلى الهداية وأن هذه الأشرطة من أعظم وسائل الهداية (( قال تعالى : { وكَذَلِكَ أَوْحَيْنَا إلَيْكَ رُوحاً مِّنْ أَمْرِنَا مَا كُنتَ تَدْرِي مَا الكِتَابُ ولا الإيمَانُ ولَكِن جَعَلْنَاهُ نُوراً نَّهْدِي بِهِ مَن نَّشـاءُ مِنْ عِبَادِنَا وإنَّكَ لَتَهْدِي إلَى صِرَاطٍ مُّسْتَقِيمٍ (52) صِرَاطِ اللَّهِ الَذِي لَهُ مَا فِي السَّمَوَاتِ ومَا فِي الأَرْضِ أَلا إلَى اللَّهِ تَصِيرُ الأُمُورُ } فيا عجباً ممن يزعم أن الهداية والسعادة لا تحصل بالقرآن ولا بالسنة ، مع أن النبي - صلى الله عليه وسلم - لم يهتد إلا بذلك ))

يقول بعض الكتاب المعاصرين : (( ولئن كان المخادعون الدجالون يظهرون تحت عنوان ( القصاص ) فيما مضى ؛ إنهم يظهرون في أيامنا هذه تحت عنوان : ( الداعية والموجه والمربي والأستاذ والكاتب والمفكر ) وما إلى ذلك من الألقاب !! )) [ تاريخ القصاص ص 33 ] .

وده كان كلامى مع بعض الاخوة فى محاورات خاصة على الانترنت الراجل بيقول نفس الكلام اهه القران والسنة يكفيان !!!

وعن حكم القصاصين يجب ان لا تتوفر فيهم الخصال التالية:

1-طلب الشهرة والارتفاع على الناس ، كما جاء ذلك عن عمر رضي الله عنه حيث يقول لمن رآه يقص : (( أخشى عليك أن تقص فترتفع عليهم في نفسك ، ثم تقص فترتفع ، حتى يخيل إليك أنك فوقهم بمنزلة الثريا فيضعك الله عز وجل تحت أقدامهم يوم القيامة بقدر ذلك )) ؛ ولقد رأينا من أمثال هؤلاء من كانت أشرطته توزع على استحياء أصبح اليوم يقال له فضيلة الشيخ ، و الله المستعان .

2-الجهل أو الضحالة العلمية ، كما جاء عن علي رضي الله عنه أنه مر على قاص فسأله : علمت الناسخ من المنسوخ ؟ قال : لا . قال : هلكت وأهلكت . وروي مثل هذا عن ابن عباس رضي الله عنه .

3-تلبسهم بالبدعة لذا فهم يدسون في القصص ما يعضد بدعهم ويقررها في نفوس الناس يقول أحد العلماء وهو يتحدث عن منكرات المساجد : (( ومنها كلام القصاص والوعاظ الذين يمزجون كلامهم بالبدعة )) ، أو مخالفتهم للسنة كحلقهم اللحى وإطالتهم للثياب ، و استعمالهم للسبحة في الذكر ونحو ذلك .

4-الكذب ، قال الإمام أحمد - رحمه الله - : (( أكذب الناس على رسول الله - صلى الله عليه وسلم - السؤال والقصاص )) ، فهم يكذبون على رسول الله - صلى الله عليه وسلم - بإيرادهم للأحاديث المنكرة والضعيفة ، بل والموضوعة ، ويكذبون في نقلهم للقصص المكذوبة ، ويكذبون في طريقة عرضهم للقصة من تهويل ومبالغة تخرج بالقصة عن واقعها الصحيح .

كمان فيه حاجة انا شفتها احد البرامج يستضيف عمرو خالد ويتحدث عن الهجرة ويتحدث عن واقعة عندما كان سيدنا محمد وابى بكر فى الغار ووقف احد الكفار يتبول وشاهده سيدنا ابو بكر ويقول عمرو خالد ان ابو بكر قال للرسول ان الكافر هذا لو كان نظر بين ساقيه كما يفعل من يتبول عادة لكان راى المختبان بالغار ثم يتصنع الحياء لانه ذكر تلك الواقعة وفى حضور عدد كبير من الانسات والسيدات !!! طب ايه لازمة سرد الواقعة دى ؟؟؟ وجابها من انهى كتاب سنة اصلا ؟؟؟ دليل اخر على ان عمرو خالد ليست له دراية بصحة الأحاديث ولا فقه المرويات والقصص التي يذكرها !!! وربما يعتمد على الكتب الصفراء التي تباع في الازبكية والازهر وهي الكتب التي لم يراجعها احد ...

وفي رمضان الماضي وصلني شريط لعمرو خالد مسجل في مسجد المغفرة وكان الدرس عن خلق سيدنا آدم ... ورد في الشريط قصة عجيبة ... وهي ان الملائكة سالت امنا حواء عن حبها لسيدنا ادم فقالت حواء انها لا تحب ادم على الرغم من انها تحبه اكثر مما يحبها !!! ممكن لو سمحتكم حد يجيبلي اصل القصة دي فين ؟؟؟ ومن اي مصدر صحيح ؟؟؟ علشان انا دورت وغلب حماري ... وسألت شيوخ المسلمين من كل ملة ولم اترفع حتى عن سؤال شيوخ الشيعة ... فلم أجد اجابة الا الانكار ... يبقى عمرو خالد جاب القصة دي منين ؟؟؟

هذه القصص العجيبة وجدت مثيل لها في كتاب قديم من كتب جدي وقد كان شيخا ازهريا والكتاب هو عن سيرة سيدنا علي بن ابي طالب رضي الله عنه ويتحدث عن عبوره السبع بحور والسبع جبال وقتله لملك الجان !!! ولا كانها حواديت الف ليلة ... وقد كان جدي يعرف ان هذا الكتاب هو من بقايا العصر الفاطمي ومليء بالتخاريف ... ثم كتاب أخر وجدته عند زميلة لي في الكلية عندما كنا ندرس الادب المقارن ونقارن بين دانتي والمعري وميلتون ... وكان الكتاب تحديدا عن رحلة الاسراء والمعراج والمفروض انه قد كتب في العصور الوسطى على ما اظن في العصر المملوكي ... فاذا بي افاجأ ان الكتاب يحرم حبوب منع الحمل ويعدها من الامور التي دخلت بسببها نسوة رآهم رسول الله في النار !!! فهل كانت تلك الحبوب معروفة على عصر النبي او حتى المماليك ؟؟؟ ام ان هناك يد عبثت بهذه الطبعة من الكتاب وتدخلت برأيها !!!

كمان عمرو خالد ما يحلالهوش الكلام الا بحضور اكبر عدد من الفتيات والسيدات وان الكاميرا بتقعد تلف وتفرجنا على البنات اللى قاعدين مشدوهين من حُسن يوسف ... قصدي من حُسن عمرو ... وممكن الكاميرا تقف على بت عجب المصوراتي البروفيل بتاعها قام مركز عليها ولا كانها حفلة لكاظم الساهر !!! مش درس ديني !!! علشان يعملوا ترويج لعمرو خالد كأي سلعة يروج لها بالفتيات الجميلات !!! ولا حول ولا قوة الا بالله !!! فهن معجبات بشخصه لا بعلمه وده واضح حتى من ردود بعض الاخوات على انتقاداتي له ... فهى ردود يغلب عليها العاطفة والحماس لا الحجة والمنطق واحب اقول للبنات دول ولعمرو خالد نفسه: بسم الله الرحمن الرحيم - وإذا سألتموهن متاعاً فسألوهن من وراء حجاب ذلكم أطهر لقلوبكم وقلوبهن - الاحزاب 53
ده حتى اليهود كما سمعت ما عندهمشى اختلاط فى الدروس الدينية واماكن العبادة

قال ابن قتيبة:
فإن القُصَّاص يُمِيلُون وجوه العوام إليهم ، ويستدرُّون ما عندهم بالمناكير والغريب والأكاذيب من الأحاديث ومن شأن العوام القعود عند القاص ما كان حديثه عجيباً خارجاً عن فِطَر العقول ، أو كان رقيقاً يحزن القلوب ويستغزر العيون

ويقول السيوطى:
ومن استعراض الأحاديث الشائعة بين عامة الناس نجد أن معظم الأحاديث الباطلة إنما سمعوها من القصَّاص . ولذلك تراهم رغبة في قبول السامعين لهم يسارعون في ابتغاء مرضاة العامة وسرورهم أكثر من حرصهم على تقويمهم وعلى تعليمهم حتى أضحى القاص كالمُغَنِّي الذي لا هم له إلا إطراب السامعين إن هؤلاء القصاص قوم مهمتهم الكلام ، وغايتهم أن يستحوذوا على إعجاب السامعين

قال الدارقطني في مقدمة " كتاب الضعفاء والمتروكين " :
توعد بالنار من كذب عليه بعد أمره بالتبليغ عنه ففي ذلك دليل على أنه إنما أمر أن يبلغ عنه الصحيح دون السقيم والحق دون الباطل لا أن يبلغ عنه جميع ما روى لأنه قال :" كفى بالمرء إثماً أن يحدث بكل ماسمع " أخرجه مسلم من حديث أبي هريرة فمن حدَّث بجميع ما سمع من الأخبار المروية عن النبي ولم يميز صحيحها وسقيمها وحقَّها من باطلها باء بالإثم وخيف عليه أن يدخل في جملة الكاذبين على رسول الله بحكم رسول الله أنه منهم في قوله :" من روى عني حديثاً يرى أنه كذب فهو أحد الكاذبين " فظاهر هذا الخبر دال على أن كل من روى عن النبي حديثاً وهو شاك فيه : أصحيح أو غير صحيح ؛ يكون كأحد الكاذبين لأنه قال :" من حدث عني حديثاً وهو يرى أنه كذب ..." ولم يقل : وهو يستيقن أنه كذب .

وهناك حديث صحيح للرسول - ص - يقول: سيكون في آخر الزمان أناس من أمتي يحدثونكم بما لم تسمعوا أنتم ولا آباؤكم فإياكم وإياهم ... وقد قال الحافظ زين الدين العراقي في كتابه المسمى بـ[ الباعث على الخلاص من حوادث القُصَّاص]: ثم إنهم- يعني القُصَّاص ينقلون حديث رسول الله من غير معرفة بالصحيح والسقيم ... وحديث اخر للرسول - ص : إن بني إسرائيل لما هلكوا قصُّوا

وتفسير هذا الحديث من الممكن أن يقال : إن سبب هلاكهم اهتمام وعَّاظهم بالقصص والحكايات دون الفقه والعلم النافع الذي يعرِّف الناس بدينهم فيحملهم ذلك على العمل الصالح لمَّا فعلوا ذلك هلكوا وهذا شأن كثير من قصَّاص زماننا الذين جل كلامهم في وعظهم الاسرائيليات والرقائق والصوفيات

وقال ابن عمر رضى الله عنه: لم يقص على عهد النبي ولا عهد أبي بكر ولا عهد عمر ولا عهد عثمان ، إنما كان القصص حيث كانت الفتنة ... وقال ابن الجوزى عن القصاصين:
أ‌-أن القوم كانوا على الإقتداء والإتباع فكانوا إذا رأوا ما لم يكن على عهد رسول الله أنكروه .
ب‌-أن القصص لأخبار المتقدمين يندر صحته .
ت‌-أن التشاغل بذلك يشغل عن المهم من قراءة القرآن ورواية الحديث والتفقه في الدين .
ث‌-أن في القرآن من القصص وفي السنة من العظة ما يكفي عن غيره ممَّا لا يتيقن صحته .
ج‌-أن أقواماً قصُّوا فأدخلوا في قصصهم ما يفسد قلوب العوام .
ح‌-أن عموم القُصَّاص لا يتحرون الصواب ولا يحترزون من الخطأ لقلة علمهم وتقواهم

وقد حرصت ان اجمع اكبر قدر من اراء العلماء من مختلف الاتجاهات كما رايتم حتى لا يقال اننى متحيز لاتجاه ما او انتمى لاتجاه ما واتشيع له دونا عن سواه ... والخلاصة ان حتى القصاص يجب ان تتوفر فيه شروط معينة

اما عن بعض الردود على انتقاداتي فكانت عبارة عن دعاء لي بالهداية واتهام لي بالحقد والضغينة والغيرة وتحجج بعدم توفر البديل الجذاب لعمرو خالد !!! واقول لهؤلاء مرة اخرى اننى لا اضمر فى صدرى ضغينة لعمرو خالد ولا لغيره ولا اطمع فى مكانته ولا اطمع فى شهرة على حسابه ولن استفيد شيئا من ايذائة كمان انا لست ادافع عن علماء الازهر المتخاذلين ولا اعفيهم من المسئولية ...

لكن تخيلوا معي التالي ... تخيلوا جمع المسلمين ماشيين فى صحراء قفر مقحلة ... تراءى لهم من البعد عين ماء ... ولكن احد العالمين بالامور تنبه الى ان ماء العين مسموم - طبعا مش انا العالم بالامور ولا حاجة ... فهل يترك جمع المسلمون يشربون بحجة انه ليس هناك ماء غيره ؟؟؟ هل عليه ان يوفر لهم البديل وهو عطشان مثله مثلهم ؟؟؟ ارجوكم اعطوا كلامى فرصة واقرأوه

ارجوكم ان تقرأوا ما كتبته حول عمرو خالد بعقولكم وليس بقلوبكم وستجدون اننى ذكرت حقائق واقوال علماء سهل التيقن من صحتها واتمنى ان لا يكون الهجوم على شخصى انا وليس فكرى فذكر الحقائق على الملأ ليس بالغيبة وليس بالتشهير بالاضافة الى ان عمرو خالد شخصية عامة ومعروفة اشمعنى يعنى نتكلم عن احمد نظيف وجمال مبارك والقذافي وعمرو خالد لا !!! شوية موضوعية من فضلكم فالتشهير والغيبة انى اقول عليه مثلا ده حمار او كلب او اقول ده زانى او سارق او زنديق لكن انا باقول كلامى وبيقراه الاف منهم من يستطيع بسهولة ان يوصله الى عمرو خالد كمان موضوع الغيبة والنميمة ده بايخ قوى واللى بيستخدمه بيستخدمه كارهاب فكرى لاغير

ومحدش مستنينى انا ولا غيرى لاننى لم ازعم ان لدى العلم اللذى يؤهلنى لان اتبوأ منبر الدعوة انا يا جماعة بقولها لكم من الاول وعلى بلاطة معايا شهادة محو امية وشهادة معاملة اطفال علشان محدش يزعل ... انا اجهل خلق الله فى الارض اذا كان ده يرضيكم ... بس خدوا كلامى لحد الاخر اشتروا منى وما تبيعوليش على رأى بتوع السوق واقرأوا واستوعبوا وانتم وضميركم بعد ذلك ... ولو طلع حاجة من اللى انا قلته غلط يبقى انا بتاع بطاطا واستاهل اللي يجرالي ...

وعلى فكرة انا لم اكتب هذا المقال كمضيعة للوقت مع من يتسمون بالسطحية والتفاهة ولا انتظر ردود من البنات اللى معلقين بوستر عمرو خالد فى حجراتهم ... وصدقوني لما اقول لكم ان فيه بنات فعلا عاملة كده ... كانه مصطفى قمر مثلا او احمد عز ولا ايه مش عارف ... الموضوع تحول الى فتنة واصبح من يدافعون عن عمرو خالد لا يدافعون عن الاسلام ولكن يدافعون عن عمرو خالد الشخص بدوافع عاطفية ولا اعتقد انهم سيهبوا وينهضوا للدفاع عن الاسلام كما يستميتون فى الدفاع عن عمرو خالد !!! والغريب ان معظم المتحيزين له من الفتيات !!!

يعنى انا اقضى الساعات الطوال فى البحث والاستماع والكتابة واستخدم الحجج والمقارنات والقياسات واستشهد بالامثلة وكلام الشيوخ لافاجأ برد تافه يعبر عن عقلية صاحبه او صاحبته ... وربنا يشيل الغمام من على عيون المسلمين لاني مش عارف الناس دي واخدة الاسلام ورايحة على فين ...

وبعضهم يتحدث عن انجازات ونتائج دعوة عمرو خالد والحقيقة لا اعرف اي انجازات يزعمون ... ماهو احنا ممكن كمان نبص للنتائج بتاعة الخومينى قد ايه ناس اتهدوا على ايديه وعمل ثورة اسلامية وعمل دولة وبيعملوا مفاعل نووى كمان اهه فى بوشهر ... يبقى يللا كلنا نشترى شرايط الخومينى يا جدعان !!! ومين اللى بدع الشيعة اصلا ؟؟؟ ماهو اكيد واحد طيب ابن حلال برضه مسلم بيصلى ويصوم زينا !!!

ومين عمل الوهابية ؟؟؟ نفس الكلام !!! مين عمل التيار السلفى ؟؟؟ ومين عمل السنة والجماعة؟؟؟ ومين عمل الدعوة والجهاد ؟؟؟ ومين عمل الطرق الصوفية ؟؟؟ ومين عمل البهائيين ؟؟؟ ومين عمل الشيعة الاسماعيلية ؟؟؟ ماهم كلهم ناس حلوة من اللى بتصلى وتصوم !!! وبيقولوا كلام حلو ومقنع برضه !!! وبيقولوا سونا اجدع ناس واللى عاوز يخش الجنة يركب معانا !!! بصرف النظر هو من الدين ولا لا !!! وناس كتير اتهدوا على ايديهم لو بتعتبروا ده هداية !!! وفهموا الدين زيهم وبقوا زيهم وها يتحشروا معاهم برضه ان شاء الله !!!

وفيه كمان بابا روما ماشاء الله ناس كتير اهتدوا على ايده وبطلوا يزنوا ويسرقوا ويشربوا خمرة ... يللا بينا على بابا روما !!!!!!
وللا اقولك ها نروح بعيد ليه ونسافر الفاتيكان ونتشحطط فيه جنبنا في اسرائيل حاخام كويس قوى برضه بيمدحوا فيه وناس كتير اتهدوا على ايده ... طالما هو ده المقياس !!! طالما اننا نصلى ونصوم ونلبس الايشارب يبقى الغاية تبرر الوسيلة ومش مهم ايه الوسيلة دى وتحتوى على ايه من الاخطاء وممكن ترسب ايه فى ذهن المسلم عن دينه وعلاقته مع غيره !!! منطق عجيب عجيب عجيب !!! وربنا يهدى !

وفي النهاية دعوني اقتبس مقولة شهيرة لحسنهم البنا فالوي عنقها واحورها واحرفها لاضعها في نصابها الصحيح واقول:
علمتنا السياسة : حسن الظن بالله وبالاسلام ... وسوء الظن بجماعة الاخوان المسلمين !!!

كانت هذه نهاية الحلقة الاولى من كلامي عن عمرو خالد وقد تناولت فيها الى حد ما فترة ما قبل صناع الحياة وان شاء الله واعطاني العمر تنتظروا الجزء الثاني وقبل ان اترككم وقبل ان انسى انني اتهمت عمرو خالد بسرقة افكاري بدون بينة اترككم مع البينة وهي كلها فقط من الحلقة الاولى من سلسلة صناع الحياة :

- برغم ان المعجزة المزعومة حققها الملاحدة الشيوعيون فى فيتنام وهزموا الامريكان بقوة ايمانهم بشىء مغلوط وهو وطنهم والايديولوجية الشيوعية ولككنا فشلنا مع ايماننا واسلامنا وده مش علشان احنا ايماننا غلط لا علشان احنا تواكلنا ولم نتوكل على الله وناخذ باسباب النصر - من مقال خطأ اسلوب عمرو خالد في الدعوة الاسلامية

- فالتفكير بعقلية المعجزات وان ربنا معانا بمناسبة ومن غير مناسبة خطأ ... يعنى الواحد ما يشتغلشى وما يفكرشى وما يجتهدشى علشان ربنا معاه؟؟؟ يعنى لا نتسلح ولا نقوى اقتصاديا وعلميا ومع ذلك ها نقهر الاعداء علشان ربنا معانا؟ - نفس المقال السابق

- نيجى للتعليم الفنى ... لازم نظرة المجتمع تتغير ليه ... اللى معاه مؤهل فنى لازم يكون محترم برضه مش الجامعيين يتعالوا عليه ... المانيا يا جدعان وباقول المانيا اللى فى اوروبا مش المانيا القمح بتاعتنا ... معظم الشعب متعلم تعليم فنى وبيشتغلوا بايديهم وقليل جدا الجامعيين واللى متعلم تعليم فنى ده ليه احترامه برضة وبيسكن فى احسن بيوت ويتجوز احسن جوازه ويركب احسن عربية لان البلد محتاجة الفنيين فعلا مش الفهلوية واللى واخدينها صنعة وبكده ها يكون فيه اقبال على التعليم الفنى والحرفى بانواعه - من مقال مقترحات وائلية لاصلاح احوال التعليم في مصر

- لقد نشأ الاسلام ضعيفا مضطهدا فى مكة ولم يظهر فجاة ولم يكن محمد صلى الله عليه وسلم ملكا على احد !!! ولكنه عانى وعانى معه المسلمون الاوائل ... ومع ذلك انتشر لقدرته على الاقناع ومحتواه الاصلاحى الكبير ومخاطبته العقل واحتوائه على خطة ونظام معقول - من مقال علماء الجهل والتغييب

- لكن ماحدش بيقول لبتاع اللبن ما يحطش عليه ميه ... ماحدش بيقول لبتاع الفول والطعمية يغسل السلطة كويس ... ما حدش بيقول للموظف ما يلطعشى الناس قدامه انتظارا لعظمة جلالته علشان يخلص طلبهم ... ما حدش بيقول لرجل الاعمال ما تقللشى فى الخامات علشان تكسب ... ما فيش حد بيقول للعلماء اسرائيل طلعت قمر صناعى فاين قمر المسلمون .... ما فيش حد بيقول اسرائيل عندها نووى طب فين نووى المسلمين - نفس المقال السابق

- عاوزين علم اعملوا انتم العلم ده واكتشفوه بانفسكم ... مش مستنيين علماء الغرب لما يكتشفوا حاجة ثم يبحثون في النصوص ويقولوا طب وايه يعني ماهي عندنا فى القرآن اهه !!! - من مقال الاستنساخ ويأجوج ومأجوج

- التاريخ لازم ياخد دوراته والايام دول يداولها الله بين الناس واللي عاوز ينهض يقوم على حيله مش قاعد مبطوط على مؤخرته لا مؤاخذه مستني فرج الله ومستني ربنا يبعتله جنودا مجندة من عنده تحارب معاه ... اللي نصر امريكا واليهود ايه ؟ معجزة ؟ ملائكة من عند الله ؟ ولا العقل البشري ؟ طب احنا ما عندناش من الصنف ده ولا خلص ؟؟؟ طب ولو عندنا مش بنستخدمه ليه ؟ ولا كل واحد عاوز يبقى فقيه ويفتي في الدين ويفتن الناس ويعملهم احزاب وشيع وكل طايفة تنعل سنسفيل جدود باقي الطوايف وتقول عليهم كفرة وده اللي احنا فالحين فيه ؟؟؟ - من مقال مصري مسلم لا أفخر بعروبتي

- تعالوا نبص كده لبداية ظهور الاسلام ... واحد وبعدين اتنين وبعدين اربعة وبعدين ثمانية ... مائة ... الف ... مليون ...
- سبحان الله كده نيجي نطبق الكلام ده على ظهور الاسلام ... نلاقي توفرت له وحدة المكان ووحدة الزمان ووحدة الحدث ... مكة والناس في مكة ... تجميع اتباع قلائل ... تجميع اتباع كثيرون ... استقطاب اتباع اقوياء للحماية ... الجهر بالدعوة لكل الناس ... اضطهاد وتعذيب ومقاطعة ... دعوة الطائف وغيرها ... الهجرات ... تقوية شوكة المسلمين ... وبعد تقوية شوكة المسلمين والاعداد الجيد الرجوع والمطالبة بالحقوق ... ثم اكتساح الاسلام للعالم القديم باسره ... تخلل تلك المسيرة الكثير من الغزوات وكذلك الهدن والتحالفات والصلح والتنازلات ... يعني كان فيه مرونة ... نتنازل في دي وبعدين ناخد دي ... نصبر لحد غيرنا ما يغلط وبعدين نرد ... وهكذا ... ماكانتشي الامور جهجهوني ومفتوحة على البحري كده ... وماكانشي الموضوع كله حرب وفتح وغزو
- نحن في مرحلة ضعف وبداية خروجنا منها ان نقر اننا في مرحلة ضعف ونتكيف مع الظروف المحيطة ونجاريها ... فالمسيح في بداية دعوته امر اتباعه بادارة الخد الايسر والرسول في بداية الاسلام لم يامر الناس بقذف الطوب والاحذية على الكفار ولم يهلل لمن يقذف بنفسه على رماحهم وسيوفهم ويقول ده شهيد وده مقاوم !!! بل كانت السرية والدعوة في الخفاء وعدم رد الاساءة
بل وصلت الى ان يترك بيت الله الحرام ويهاجر الى المدينة حتى تتحسن الظروف وهو موقن بالعودة ويعمل ويعد لها ... كلنا نتصور ان غاندي هو صاحب فكرة المقاومة السلبية ... لا ابدا والله !!! سيدنا محمد رسول الله هو اسبق من اتبع هذا التكنيك !!!
- اي نعم احنا شفنا فترات ازدهار وكنا امبراطورية مرهوبة الجانب وكنا خير امة اخرجت للناس وكنا وكنا وكنا ... خير امة اخرجت للناس يعني لخير الناس سواء نصارى او يهود او هندوس او غيرهم... مش اخرجت علشان ترازي في الناس وتعاديهم ... مش اخرجت لشر الناس وارهابهم ... اخرجت لتكون قدوة لتحبب خلق الله في دين الله حتى يدخلوا فيه ... اي نعم احنا كنا عزيز قوم بس خلاص ذل ... ايه فيه ايه ؟؟؟ بتحصل يعني عادي ... والحياة مش بتقف ... ها نفضل عايشين في الماضي ؟ ومغرورين ومتكبرين واحنا اساس مش لاقيين
- لان ربنا خلق الكون في ستة ايام وعلى مراحل ليضرب لنا مثلا عن اهمية التخطيط والتروي - كل ما سبق من نفس المقال السابق

قارنوا معادلة عمرو خالد في الحلقة الاولى من صناع الحياة !!!

يحكى ان الامام ابن حزم استفتاه احدهم فافتاه وهو لا يعلم من الرجل .. ثم بعد انصراف الرجل .. اعاد ابن الحزم دراسة الفتوى فوجدها خاطئة ... فهل تتخيلون ما فعل ؟؟ ارسل فى المدينة مناديا ينادى :ايها الناس من افتاه ابن فان ابن حزم قد اخطأ !!! فلماذا لا يفعل ذلك عمرو خالد .. لماذا لا يعترف بخطأه ... ويختفي ويبطل اللي بيعمله ده وكفاية لحد كده !!! لكن للاسف مش دي طبيعة الوضع !!! للاسف سيعود لكم عمرو خالد في منتصف شهر فبراير الحالي بحلقات جديدة من برنامجه الشهير ... استعباط الحياة ...

وائل عباس

1 Comments:

At الاثنين, محرم 12, 1426 10:53:00 م, Blogger Nohaz said...

y did u delete my comment ya wael?

 

إرسال تعليق

<< Home